Europako hainbat eskualdetako 70 pertsona baino gehiago elkartu dira nahi ez den bakardadearen aurrean KORALEri esker

Europako hainbat eskualdetako 70 pertsona baino gehiago elkartu dira nahi ez den bakardadearen aurrean KORALEri esker

Danimarka Zentralak, Europako proiektuko bazkideetako batek, gazteen bakardadeari buruzko webinar bat eskaini du, eta Gipuzkoako HARIAK ekosistemako 30 eragilek baino gehiagok parte hartu dute bertan

Europako hainbat eskualdetako 70 pertsonak baino gehiagok egin dute bat asteazken honetan nahi ez den bakardadeari buruzko webinar batean, KORALEren, ADINBERRI Fundazioa buru den eta Austriak, Belgikak, Danimarkak, Irlandak eta Portugalek parte hartzen duten Interreg Europe programaren proiektuaren, esparruan. Online saioak interes handia piztu du Gipuzkoan arlo horretan lan egiten duten eragile askoren artean. Izan ere, lurraldeko 30 pertsona inguruk hartu dute parte webinarrean.

Berit Kjærside Nielsen Danimarka Erdialdeko ‘Defactum’ programako ikertzaile nagusiak ‘Loneliness in Emerging Adulthood’ izeneko saioa eskaini du. Bertan gazteen esperientzietan sakondu da gero eta handiagoa eta kezkagarria den fenomeno horren inguruan, nerabezaroaren eta helduaroaren arteko trantsizio-etapako bakardadeari helduz. Garai horretan identitatearen esplorazioa, rol sozialen aldaketa eta independentziaren igoera dira sentimendu hori arindu edo areagotu dezaketen funtsezko faktoreak. 

Ikerketa kualitatibo hori Berit Kjærside Nielsenek, Lise Arnth Nielsenek eta Mathias Lasgaardek zuzendu dute, eta bakardadea nola sortzen den eta heldu gazteek nola esperimentatzen duten eta beren eguneroko bizitzan nola adierazten duten sakonago ulertzea zuen helburu. Azterketa horretan 18 eta 25 urte bitarteko 21 gaztek hartu zuten parte, erdiak beste pertsona batzuekin bizi ziren, eta erdiak baino gehiagok egungo edo iraganeko osasun mentaleko arazoen berri eman zuen. Gazteek ikusezintasuna, emoziorik eza eta aintzatespenerako irrika adierazi zituzten, besteak beste. 

Eskola-jazarpena, arrasto iraunkorra 

Esperientzia goiztiarrek, hala nola eskola-jazarpenak, familia-zailtasunek, gaixotasunek edo etxez sarritan aldatzeak nabarmen bultzatu zuten gazte horien bakardadea. Gainera, eskola-garaiko gizarte-bazterketak autoestimu txikia eragin zien eta bakardade-sentimendua areagotu zuen. Horren ondorioz, parte-hartzaile askok zailtasunak izan zituzten harreman garrantzitsuak ezartzeko. 

Ildo horretan, ikerketak ondorioztatu du identitatearen garapena txiki-txikitatik bultzatzeak aldea marka dezakeela, eta gazteak ikusgai eta kaltebera izateko eskubidea duten espazioak sortzeak, baita mundu digitala mundu errealarekin konektatzea ere, nahi ez den bakardadeari heltzeko eta horri aurrea hartzeko funtsezko bi puntu direla. Webinarrean parte hartu dutenek aukera izan dute Thea Iversen ‘More Together’ gazte adituen taldeko kideak bakardadeari buruz eskaini dituen kontakizuna eta esperientzia pertsonala zuzenean entzuteko. 

HARIAK, Gipuzkoako estrategia

ADINBERRI Fundazioak, KORALE europar proiektuaren liderrak, aurkeztu du webinarra. Rakel San Sebastian zuzendariak eskerrak eman dizkie bazkideei saioan parte hartzeagatik, baita Europako hainbat lekutatik konektatu diren eragile guztiei ere. “Plazera da Europako hainbat tokitako hainbeste pertsonak nahi ez den bakardadeari heldu eta aurrea hartu nahi izatea, beren aletxoa jartzea politika publikoak eraldatzeko eta Europa espazio kohesionatu bihurtzeko”, adierazi du.

ADINBERRIk urteak daramatza HARIAK estrategiaren bidez inplikatuta Gipuzkoan nahi ez den bakardadea lantzen eta prebenitzen, eta KORALEko buru izateak aukera ematen dio, bizitzaren etapa goiztiarretan inplementatuta fenomeno horren eragina murriztera eramaten duten beste herrialde batzuetako esku hartze politikak ezagutzeko.